بعد انتشار فيديو لكاهن حاملاً سلاح حربي.. الكنيسة تُعلق
نشرت كنيسة مار مارون مزرعة يشوع عبر صفحتها الخاصة على فيسبوك التالي:
عظة ليلة عيد الميلاد:
(حاملاً كلاشنيكوف) من الفين سنة تقريباً بيجتمعو المسيحية كل سنة تيعيدو هالحدث العظيم: عمانوئيل! الله معنا…
نحن احفاد اجيال من المسيحيي المؤمنين يللي تكمشو بايمانن بأحلك الظروف وبوج كل الصعوبات. وأعلنا على صوت عالي عمانوئيل! الله معنا!
بس الملاك بشر يوسف بولادة يسوع وكتب متى بانجيلو: ليتم ما قاله الرب بالنبي: ها ان العذراء تحبل وتلد ابناً يدعى اسمه عمانوئيل اي الله معنا، يمكن كان عم يسترجع تاريخ من ابراهيم حتى يوحنا المعمدان عن قصة حب عاشها الله مع الناس ودونت بالعهد القديم ونقلت النا عن انو الله ما بيترك شعبو، دايماً معو بيحميه وبيدافع عنو وبينصرو، مما دفع شعب الله يكتب صلوات متل :
بِعَصًا مِن حديدٍ تُكَسّرهم وكإِناءِ خزَافٍ تُحَطًّمُهم (مز2/9)
قُمْ يا رَبِّ خَلِّصْني يا إِلهي فإِنَّكَ لَطَمتَ جَميعَ أَعْدائي وحَطَّمتَ أَسْنانَ الأَشْرار. (مز3/8)
عِندَ اْرتدادِ أَعْدائي إِلى الوَراء يَعثُرونَ ويَبيدونَ مِن أَمام وَجهِكَ …قَمَعتَ الأُمَمَ وأَبَدتَ الشَرير مَحَوتَ أسمَهم أَبدَ الدُّهور. العَدُوُّ قُضِيَ علَيه، خَرابٌ لِلأَبَد (مز9)
من هيك صارو يسمو الله: اله الجنود (مز89/9) le dieu des armées
وللبعض عمانوئيل= الله معنا ضد أعداءنا. نحن هيك، منطلب من الله ياخد بحقنا، ينصفنا، ويرد للشرير شرو.
بتجي الرسالة للعبرانيين يللي منقراها اليوم بتقول انو من قديم الزمان الله حكي مع شعبو وبعتلن انبياء كتير، وبآخر الزمن بعت يسوع يللي بتسمي الرسالة، وهيدا شي كتير مهم، شُعَاعُ مَجْدِهِ وصُورَةُ جَوهَرِهِ، يعني يسوع بيكشف الصورة الحقيقية عن الله وبيصحح صور تاني تراكمت بعقول المسيحيين.
صورة كاهن حامل رشاش بتليق بيسوع؟ اكيد لأ!
اعمال العنف والخناقات والمرجلات بتشبه يسوع؟ هو يللي منسمي وديع متواضع القلب.
ازا السلاح ما بيلبق للكاهن لي بدو يلبق لألله؟
يسوع بدل الرشاش بالصليب، سامح اعداؤو وجعلهن من جماعتو، نحن اليوم منشوف بالمغارة مجوس، يعني وثنيين غير مؤمنين جايين ليسجدو ليسوع، وبعدين عالصليب رح منشوف انو اللي اعترف فيه كان وثني قائد مئة.
الله معنا مش يعني بينصرنا ضد أعدائنا، الله معنا يعني بيصالحنا معن. برسالة افسس الفصل 2 بيقول خلا البعيدين يصيرو قريبين: فإِنَّه سَلامُنا، فقَد جَعَلَ مِنَ الجَماعتَينِ جَماعةً واحِدة وهَدَمَ في جَسَدِه الحاجِزَ الَّذي يَفصِلُ بَينَهما، أَيِ العَداوة.
هالشي خلا المسيحيين يغيرو مفهومن لألله وتسميتن الو من le dieu des armées au Dieu désarmé
ازا نحن مسيحيي بطّل عنا اعداء، وحاج نحن واهل بيتنا ونحن وجيراننا ونحن والجب التاني او العيلة التاني او الحزب التاني منضل واقفين عسلاحنا. خلص. بطل لازم نضل واقفين عسلاحنا. (كب كلاشنكوف وأخذ الصليب) بل لازم نضل واقفين عسلاحنا، هيدا سلاحنا (الصليب). نحن ما منربح بالحرب والمكاسب، نحن منربح بالحب والغفران. كونو مسيحيين ووقفو عسلاحكن متل ما يسوع وقف عسلاحو!
